亞姐:趙桐恩拎友誼小姐驚入唔到三甲

東網on.cc   2020-10-31 16:14

https://tv.on.cc/hk/index.html?i=OEN201031-8524-1614-M&d=1604149162

亞姐香港區決賽將於明晚舉行,今日14位候選佳麗出席綵排,眾女身穿「星光旗袍」,但款式略嫌老土,未能盡晒身材。期間大會宣布(15)趙桐恩獲「友誼小姐」、(9)彭紫荊獲「炫出自我大獎」,其中趙桐恩得獎時一臉難以置信,而彭紫荊就喜極而泣!趙桐恩解釋因事前大會沒講過今日會頒獎及見記者:「我完全冇諗過自己會攞獎,所以好驚嚇、好呆滯,得獎嗰吓係呆咗先開心,係落咗台先開心。」她又坦言本身都有一班朋友,但參加了比賽後才主動認識新朋友,坦言其他佳麗都會與她傾心事:「因為我哋綵排完都晏,所以會一齊食飯傾偈。(你抵得諗?)都係。」

彭紫荊表示得獎時相當激動,是因為亞視執行董事陳偉傑表示她是入圍佳麗的邊緣人,她說:「我都幾感觸,當初都覺得自己幾有信心入圍,點知我係邊緣人物,嚟到之後先知自己有好多不足,例如面對鏡頭、儀態,但經過大會訓練已有改善。(開心到當自己攞咗冠軍?)喺自己心中已係冠軍。」問睇好誰入三甲?她想了一會,笑言:「大家都有各自美貌同才華,全部都好優秀。(一定要揀?)咁我揀自己同身邊嗰位啦。」趙桐恩又笑言跟彭紫荊選擇一樣。

問到可擔心現時攞了獎不會再入三甲?彭紫荊說:「唔擔心,會表現最好嘅自己。」但趙桐恩就直言擔心攞了友誼小姐難入三甲:「驚呀,通常攞完友誼小姐都同三甲冇緣,惟有接受同Enjoy The Show。(寧願唔攞友誼小姐?)咁又唔係,友誼小姐都係另一方面才華,人緣好好有用。」